லிபியா, ஜூலை 31- ஐஎஸ் தீவிரவாதிகளால் கடத்திச் செல்லப்பட்ட 4 இந்தியப் பேராசிரியர்களில் 2 பேர் மீட்கப்பட்டுள்ளனர்.
லிபியா தலைநகர் திரிபோலி அருகேயுள்ள சிர்தே நகரில் உள்ள பல்கலைக்கழகத்தில் பணியாற்றிய கர்நாடகா, ஆந்திராவைச் சேர்ந்த 4 பேராசிரியர்களை ஐஎஸ் தீவிரவாதிகள் கடத்திச் சென்றனர்.
சிரியா, ஈராக், லிபியா உள்ளிட்ட நாடுகளில் ஐ.எஸ். தீவிரவாதிகளின் ஆதிக்கம் அதிகம் உள்ளது. அவர்கள் அங்கு பணிபுரியும் வெளிநாட்டினரைக் கடத்திப் பிணையத் தொகை வசூலித்து வருகின்றனர். சிலரைத் தலை துண்டித்துப் படுகொலை செய்து வருகின்றனர்.
இதனால் மிகுந்த பதற்றம் உண்டானது. அவர்களைப் பத்திரமாக மீட்க, இந்திய வெளியுறவுத்துறை அமைச்சர் சுஷ்மா சுவராஜ் தீவிர முயற்சிகளை மேற்கொண்டார்.
இந்நிலையில், கடத்தப்பட்ட 4 இந்தியர்களில் தற்போது லட்சுமிகாந்த், விஜயகுமார் ஆகிய இருவர் மீட்கப்பட்டுள்ளதாகவும், அவர்கள் பத்திரமாக சிர்தே பல்கலைக்கழகத்திற்குக் கொண்டு வந்து சேர்க்கப்பட்டுள்ளதாகவும், மற்ற இருவரையும் மீட்க முயற்சிகள் மேற்கொள்ளப்பட்டு வருவதாகவும் வெளியுறவுத்துறை அமைச்சர் சுஷ்மா சுவராஜ் தெரிவித்துள்ளார்.
