சிங்கப்பூர், மார்ச் 21 – சிங்கப்பூரின் தந்தை என அழைக்கப்படும் அந்நாட்டின் முன்னாள் பிரதமர் லீ குவான் இயூவின் (வயது 91) உடல்நிலை மிகவும் கவலைக்கிடமான நிலையில் உள்ளதாக இன்று சிங்கப்பூர் அரசு அதிகாரப்பூர்வமாக அறிவித்துள்ளது.
கடந்த பிப்ரவரி 5-ம் தேதி, நிமோனியா காய்ச்சல் காரணமாக சிங்கப்பூர் பொது மருத்துவமனையில் அனுமதிக்கப்பட்ட லீ குவான் இயூவுக்கு தீவிர சிகிச்சை மேற்கொள்ளப்பட்டு வருகின்றது.
என்றாலும், அவரது உடல்நிலையில் எந்தவித முன்னேற்றமும் இன்றி அபாயக்கட்டத்திலேயே இருப்பதாக கடந்த சில நாட்களாக தொடர்ந்து அறிவிக்கப்பட்டு வருகின்றது.
சிங்கப்பூர் மருத்துவமனை கட்டிடத்தின் ஒரு பகுதியில், லீ குவான் இயூவிற்காக பொதுமக்கள் தங்களது பிரார்த்தனைகளை மேற்கொள்ள இடம் ஒதுக்கப்பட்டுள்ளது.
அதில் தினமும் பல சிங்கப்பூரர்கள் மலர்களை வைத்து லீ குவான் இயூவிற்காக பிரார்த்தனைகளை மேற்கொண்டு வருகின்றனர்.
